用呼吸同平衡對抗疲勞

近年嚟，好多人都有疲勞，甚至慢性疲勞（Chronic Fatigue）嘅困擾——個人覺得冇力、唔想郁、冇動力做任何嘢、難集中精神。喺 Breath BluePrint 嘅理念入面，我哋相信第一步就係 意識到問題：明白疲勞係乜嘢，點解佢會慢慢滲入你嘅生活。

疲勞其實係一種訊號——你要聽得懂佢

疲勞唔單止係攰。所謂慢性疲勞（持續6個月以上），有機會出現以下情況：

• 成日都攰，瞓極都補唔返

• 難以集中精神

• 肌肉乏力或者酸痛

• 情緒低落、煩躁、不安

• 難入睡或瞓得唔深

• 唔想郁、冇動力做嘢

Breath BluePrint 嘅核心哲學係：健康 = 平衡。如果你身體入面有啲嘢失衡，佢就會透過各種「訊號」提醒你，例如：疲勞。其實，身體識得發出訊號，反而係件好事，代表你個系統仲有回應能力，佢喺等你採取行動。

「五大健康支柱」——Breath BluePrint 方法

想對抗疲勞，我哋建議你檢視生活中以下五方面：

1. 瞓覺 Sleep

2. 飲食 Food

3. 運動 Movement

4. 人際關係 Relationships

5. 壓力 Stress

   
   

1. 瞓得好唔好？

瞓覺係修復嘅黃金時間。唔夠瞓或者質素差嘅睡眠，係疲勞主要來源之一。你可能會有以下問題：

• 用口呼吸瞓覺

• 睡眠窒息症（你未必知自己有）

• 睡眠環境太差（燈光、聲音、溫度）

呢啲都會打亂你身體修復同回復精神嘅節奏。訓練自己用鼻呼吸、改善呼吸節奏，對改善睡眠非常有效。

2. 食物係補你定拖你？

你嘅飲食係幫緊你，定係拖緊你？注意以下幾點：

• 食咗太多發炎性食物（糖、炸嘢、加工食品）

• 飲太多咖啡因

• 缺乏微量營養素（例如鐵、鎂、維他命B群）建議做bloodwork，知道自己缺乏什麼元素

有時候，「食少啲，先係多」——簡單乾淨嘅飲食、有節制嘅斷食，都有助身體回復平衡。

3. 有冇郁？定係郁得太勁？

唔郁：血液循環差，新陳代謝慢，廢物積聚，影響精神。郁得太勁：訓練過度，長期勞損，令你個系統過勞。

我哋身體其實好識應付適度壓力，但長期高壓或者過度運動，會導致慢性疲勞。建議以中等強度、有節奏嘅活動為主，例如步行、拉筋、輕運動等。

4. 你嘅社交圈健康嗎？

研究證實，有健康嘅人際關係可以：

• 減少壓力荷爾蒙

• 提升快樂激素（如多巴胺、血清素）

• 增強免疫力

例如：同朋友行山、食飯、傾計、做運動——呢啲都係對抗疲勞嘅天然方法。相反，如果你嘅社交圈充滿煙酒、夜生活、不良習慣，又或者你太孤立自己，都會令身心更加虛耗。

5. 壓力：最隱藏嘅元兇

壓力係好多慢性疲勞個案背後嘅黑手。來自：

• 工作壓力

• 家庭壓力

• 課業壓力

• 運動過度

• 財務、關係問題

長期壓力會導致慢性炎症，破壞心血管同神經系統，甚至引發自律神經失調。而呼吸，就係你處理壓力嘅第一道防線。

呼吸，係對抗疲勞最基本嘅工具

呼吸唔單止供氧，仲會影響：

• 自律神經（即你嘅壓力反應系統）

• 血液含氧量同循環效率

• 器官功能同內分泌

• 精神集中力同情緒狀態

好嘅呼吸模式可以令你即時由「過度刺激」模式轉為「放鬆修復」模式，開啟身體本來就有嘅自我療癒機制。

從「無意識呼吸」變成「有意識呼吸」

想改善唔使一步登天，你可以 由覺察自己嘅呼吸開始。

你有冇發現自己：

• 呼吸太快？

• 吸氣唔夠深？

• 呼氣唔夠長？

當你開始 慢慢觀察自己嘅呼吸，你會發現原來你一日到晚都喺過度呼吸，令神經系統長期處於緊張狀態。我哋目標係每分鐘平均 6次呼吸，避免過度吸氣。

與大自然呼吸

簡單呼吸訓練練習（你可以即刻試）

步驟如下：

• 鼻吸氣4秒

• 輕輕停1秒

• 鼻呼氣6秒

• 重複2–5分鐘

每日意識到就做，特別係覺得攰、緊張、坐唔定嘅時候。慢慢咁訓練，呢個節奏會變成你「無意識」都會做嘅呼吸模式。

效果係咩？

由過度亢奮 → 平靜集中

由冇電虛脫 → 自然回復

總結：聽身體講，從呼吸開始

疲勞唔一定係病，有時只係身體叫你停一停、調一調。

你可以由 呼吸 開始，由覺察開始，逐步回復內在系統嘅平衡同健康。

掌握呼吸，等於掌握自己嘅生命節奏。

Master your breath, master your life!